Papel ni Villar sa DPWH probe, kinuwestyon

 Binatikos ng ilang opisyal at grupo ang pamumuno ni Senador Mark Villar sa imbestigasyon ng Senado hinggil sa umano’y iregularidad sa Department of Public Works and Highways (DPWH) sa gitna ng pangamba na maaaring magkaroon ng conflict of interest dahil sa ugnayan umano ng kanyang pamilya sa ilang proyektong iniimbestigahan.

Ayon kay Las Piñas Rep. Mark Anthony Santos, hindi umano magiging patas ang proseso kung mismong mga kaanak ng senador ay posibleng konektado sa mga kontrata. “Kung mismong mga kamag-anak ni Senador Villar ay maaaring sangkot sa mga kuwestiyonableng kontrata, paano magiging patas ang proseso? Hindi siya maaaring mamuno sa isang imbestigasyon kung saan lantad ang conflict of interest,” giit ni Santos.

Noong Agosto 19, pinangunahan ni Villar ang pagdinig ng Senate Blue Ribbon Committee ukol sa mga ghost flood control project kung saan nanawagan siya ng mas maayos na flood control master plan at pagpapanagot sa mga tiwaling kontratista.

Nagbabala rin ang senador na hindi dapat nasasayang ang pondo ng bayan sa mga proyektong mahina ang pagkakagawa o walang kaugnayan sa mas malawak na plano.

Gayunman, iginiit ni Santos na walang naiwang malinaw na master plan si Villar nang lisanin niya ang DPWH noong 2021 sa kabila ng limang taon niyang panunungkulan.

Nauna nang iniulat ng Bilyonaryo News Channel (BNC) na higit ₱18 bilyong halaga ng kontrata ang umano’y nakuha ng isang kumpanyang konektado sa pamilya Villar na karamihan ng mga proyektong ito ay na-award sa Las Piñas—ang balwarte ng pamilya Villar—at ilang bahagi ng Calabarzon na kasalukuyang iniimbestigahan.

Lalo pang lumawak ang kontrobersya nang masangkot sa isyu si Carlo Aguilar, dating konsehal ng Las Piñas at kamag-anak ni Villar, na konektado umano sa ilang kontrata ng DPWH sa Southern Metro Manila.

Ang mga proyektong ito ay kasalukuyang iniimbestigahan dahil sa alegasyon ng overpricing at mahinang kalidad ng implementasyon.

DOST Region 1 ikinasa Data-Driven Agriculture sa Project SARAI

 Inihahanda ng Department of Science and Technology Region 1 (DOST Region 1), sa pamumuno ni Regional Director Teresita A. Tabaog at Assistant Regional Director for Field Operations Decth-1180 P. Libunao, ang pagpapatupad ng Smarter Approaches to Reinvigorate Agriculture as an Industry in the Philippines o Project SARAI sa Ilocos Region.

Layunin ng proyekto na makapaghatid ng makabagong teknolohiya gaya ng remote sensing, GIS, crop models, at weather advisories upang makapagbigay ng tamang impormasyon para sa mas mahusay na pagsasaka at climate adaptation. Kamakailan, dumalo ang SARAI Team One ng Region 1 sa serye ng pagsasanay na isinagawa online (Setyembre 2–4, 2025) at sa PCAARRD, Los Baños (Setyembre 9–10, 2025). Natutunan nila ang paggamit ng GIS tools, Google Earth Engine para sa crop monitoring, NDVI computation, at pamamahala ng Automatic Weather Stations (AWS) at weather data.

Dumalo rin ang grupo sa SARAI inception meeting noong Setyembre 8, 2025 para sa pagbubuo ng mga layunin at koordinasyon ng mga regional hubs.

Sa tulong ng pamunuan at dedikasyon ng teknikal na team, inaasahang magiging sentro ang DOST Region 1 sa pagpapalaganap ng data-driven agriculture. Sa pagtatayo ng SARAI Regional Hub, magkakaroon ang mga magsasaka at LGUs ng access sa makabagong kaalaman at kasangkapan upang mapataas ang ani, mabawasan ang panganib, at maging mas matatag ang agrikultura sa Ilocos laban sa climate change.

Escudero kinuwestiyon mas mataas na budget sa flood control kesa sa agri

 Pinatotohanan ni Agriculture Sec. Francisco Tiu Laurel ang pagkuwestyon ni Sen. Chiz Escudero sa mas mataas na pondo sa flood control projects kaysa sa sektor ng agrikultura nitong mga nakalipas na taon.

Sa 47th Asean Ministers of Agriculture and Forestry Summit sa Pasay City nitong Miyerkules, nagpasalamat si Laurel kay Escudero dahil sa pagsusulong ng senador na mapataas ang pondo ng kanyang pinamumunuang departamento. Sa manifestation sa plenaryo ng Senado noong nakaraang Lunes, pinaboran ni Escudero ang planong ilipat ang mas malaking budget sa Department of Agriculture (DA) sa halip na ituon sa flood control budget.

“Taong 2023 noong itinalaga si Ginoong Kiko Laurel bilang Kalihim ng Kagawaran ng Agrikultura. Bilang suporta sa kaniyang mandato, tinanong ko noon ang isang simpleng katanungan: bakit mas malaki ang pondo ng flood control kesa sa agrikultura?” anang senador sa kanyang speech.

Nasa P102.16 bilyon lamang ang naging pondo ng agrikultura noong 2023 samantalang umabot sa P980.25 bilyon ang naging budget para sa flood control mula 2023 hanggang 2025, o P326.75 bilyon kada taon. 

Ayon kay Escudero, tinulungan niya si Laurel na bawasan ang flood control budget at idagdag sa 2024 budget ng DA. Subalit tumawag umano sa kalihim si dating Cong. Zaldy Co at pinapatanong daw ni Speaker Martin Romualdez kung bakit binawasan ang pondo para sa flood control.

Matatandaan na ngayong budget season para sa 2026, nagdesisyon ang Pangulo na ilipat ang bahagi pondo ng Department of Public Works and Highways sa ibang ahensya para maiwasan na maulit ang anomalya sa mga ghost project.

Ikinagalak ni Laurel ang hakbang ni Marcos upang mapaglaanan ng mas malaking pondo ang mga magsasaka, mangingisda, at iba pa sa sektor ng agrikultura sa susunod na taon.