PBBM walang pananagutan kahit pinirmahan 2025 budget – Palasyo

 

Nanindigan ang Malacañang na walang pananagutan si Pangulong Ferdinand “Bongbong” Marcos Jr. sa anomalya sa mga flood control project kahit pa siya ang pumirma sa 2025 national budget at sa prinsipyo ng command responsibility.

Ayon kay Palace Press Officer Atty. Claire Castro, dumaan sa masusing pag-aaral ng economic team ng Pangulo ang 2025 budget, at mayroong mga na-veto batay na rin sa ginawang masusing pagbusisi sa pambansang budget.

Sinabi ni Castro na nakakasiguro ang Pangulo na wala siyang kinalaman sa anomalya kaya mala¬kas ang loob nito na magpaimbestiga.

“Hindi maglalakas-loob ang Pangulo na siya mismo ang magpaimbestiga kung alam niya sa sarili niya na mayroon siyang maling ginawa, maliban lamang kung mayroong gagawa ng kuwento para sirain ang pangalan nito,” ani Castro.

Kaya aniya nasabi ng Presidente na mayroon ng mga natapos na flood control project noong 2024 dahil galing ito mismo sa kanyang Cabinet secretary subalit noong nakita niya na hindi nagtugma ang report ay nagpaimbestiga ito.

“Kaya masasabi natin na ang Pangulo lamang ang kauna-unahang Pangulo na nagpapaimbestiga mismo sa maanomalyang flood control projects sa ilalim ng kanyang administrasyon,” dagdag ni Castro.

DPWH pinabubuwag, papalitan ng bagong ahensiya

 

Inilutang ni Bacolod Rep. Albee Benitez ang ideya na buwagin ang Department of Public Works and Highways (DPWH) at lumikha ng bagong departamento dahil maaa¬ring hindi umano sapat ang pagpapatupad ng reporma upang matugunan ang sistematikong korapsiyon.

Sa isang pahayag, sinabi ni Benitez na dahil sa lawak ng korapsiyon sa ahensiya ay naging kuwestyunable ang pananatili ng DPWH.

Iginiit rin ni Benitez ang pangangailangan na gumawa ng hakbang ang Kamara de Representantes upang mapigilan ang malawakang korapsiyon sa DPWH.

“The people are waiting to see if our chamber can reassert its relevance and act not out of self-interest but for the people’s benefit. I sincerely hope that we can still find practicable solutions to address systemic corruption in our government,” sabi ni Benitez.

Ayon sa mambabatas nasa Kongreso ang paggawa ng batas na may matalim ang ngipin upang bumaon sa makakapal na balat ng mga sangkot sa sabwatan kaya naging posible ang korapsiyon lalo na ngayong dumarami ang miyembro ng Senado at Kamara na nakakaladkad sa anomalya.

“That more and more lawmakers and powerful personalities, including former Speaker Martin Romualdez, are being accused not so much of dipping their hand in the people’s money, but taking truckloads of it, only emphasizes why it is necessary that the Independent Commission for Infrastructure take immediate action and expedite its ongoing investigation,”

Zaldy Co ipatutugis sa Interpol

 

Hihiling ang Department of Justice (DOJ) ng Blue Notice sa International Criminal Police Organization (Interpol) laban kay Ako Bicol Party-list Rep. Elizaldy “Zaldy” Co.

Inatasan ni Justice Secretary Jesus Crispin Remulla ang aplikasyon ng notice sa lokal na tanggapan ng Interpol, kasunod ng im¬bestigasyon ng Senate Blue Ribbon Committee at rekomendasyon ng National Bureau of Investigation na kasuhan si Co.

“Yes we’re working on it. Yes, I’m asking Assistant Secretary Eli Cruz to help us with the Blue Notice,” ani Remulla.

Ang Blue Notice ay abisong internasyonal para mangalap ng impormasyon kaugnay ng isang kasong kriminal. Hindi ito utos ng pag-aresto.

Inirerekomenda ng NBI ang pagsasampa ng kaso kay Co at iba pa dahil sa umano’y paglabag sa Anti-Graft Law, indirect bribery, at malversation of public funds. Tiniyak naman ni Co na babalik siya sa Pilipinas upang harapin ang mga alegasyon laban sa kanya, base sa liham na ipinadala kay House Speaker Faustino Dy III

Sumulat si Co sa Office of the Speaker kaugnay ng pagkansela sa kanyang travel clearance at utos na bumalik sa Pilipinas sa loob ng 10 araw o hanggang Setyembre 29.

“I have every intention of returning to the Philippines. I am also intent on belying the false claims made against me before the proper forum,” giit ng solon. “Yet, I am very much apprehensive about what awaits me should I return to the Philippines given that the public and your good office have prejudged me.”

Pinasinungalingan naman ni Co ang paratang sa kanya ng mga politiko na siya ang may kagagawan ng budget insertion sa 2025 at iginiit na ang ulat ng bicameral conference committee at 2025 GAA ay inaprubahan ng Senado at Kamara.

Hindi rin umano totoo ang mga paratang na eroplano niya ang ginamit upang dalhin si dating Pa¬ngulong Rodrigo “Digong” Duterte sa The Hague, kung saan ito nakakulong ngayon. Itinanggi rin nito ang alegasyon na humingi ito ng fish import allocation para sa ZC Victory Fishing Corporation.