International Series iho-host ng PSC

 

Pamamahalaan ng Philippine Sports Commission (PSC) ang Manila leg ng bigating International Series sa Oktubre 23 hanggang 26 sa Sta. Elena Golf and Country Club.

Ayon kay PSC chairman Patrick “Pato” Gregorio, isang malaking karangalan ang maging host ng nasabing world-class golf event.

“We are proud to welcome some of the finest golfers in the world for the tournament, just a month after the FIVB Men’s Volleyball World Championships,” ani Gregorio.

“This reinforces our advocacy for sports tourism and highlights the Philippines as a premier destination for international competition,” dagdag pa nito.

Babanderahan ni top-ranked golf ace Miguel Tabuena ang mga Pinoy golfers na makakatapat sina LIV Golf stars at major champions Bubba Watson, Patrick Reed, Charl Schwartzel at Louis Oosthuizen.

“We’re thrilled to finally bring the International Series to the Philippines and connect with the country’s passionate golf community,” ani International Series head Rahul Singh na nakasama si Tournament Director Pat Janssen sa isang courtesy visit kay Gregorio.

Italy sa semis

 

Nagmartsa ang World No. 2 Italy sa semifinals ng 2025 FIVB Volleyball Men’s World Championship matapos dominahin ang World No. 15 Belgium, 25-13, 25-18, 25-18, kahapon sa Mall of Asia Arena sa Pasay City.

Patuloy ang pagdedepensa ng mga Italians sa kanilang suot na korona kasabay ng pagsibak sa mga Belgians sa 32-team tournament.

Lalabanan ng Italy sa semifinals ang mananalo sa quarterfinals match ng World No. 1 Poland at World No. 14 Turkiye na naglalaro pa kagabi habang isinusulat ito.

Umiskor si Roberto Russo ng 12 points para banderahan ang mga Ita­lians na naghari sa World Championship noong 19­90, 1994, 1998 at 2002.

“We know that Belgium is a great and powerful team, but I’m really for this win,” wika ni Russo na tumipa ng anim na attacks, apat na blocks at dalawang service aces.

Nagdagdag si Alessandro Michieletto ng 11 markers tampok ang pitong blocks at may 10 points si Mattia Bottolo habang may 30 excellent sets si 2022 World Championship MVP Simone Giannelli.

Pinamunuan ni Ferre Reggers ang Belgium sa kanyang 13 points mula sa 13 attacks habang nag-ambag si Sam Deroo ng 11 markers buhat sa 11 hits.

Hinataw ng Italy ang 12-5 abante sa first set patungo sa 25-13 panalo at ipinoste ang 16-11 bentahe sa Belgium sa second frame galing sa palo ni Michieletto.

Ang block ni Russo kay Reggers ang sumelyo sa 25-18 pananaig ng mga Italians sa mga Belgians at kunin ang 2-0 lead sa laro.

Muli ring inilista ng Italy ang 16-12 bentahe sa third set bago inilapit ni Reggers ang Belgium sa 18-23.

Ang ace ni Russo ang kumumpleto sa straight-sets win ng mga Italians para sumampa sa semifinals.

Samantala, lalabanan ng World No. 16 Iran ang World No. 18 Czechia ngayong alas-3:30 ng hapon kasunod ang salpukan ng World No. 4 USA at World No. 14 Bulgaria sa alas-8 ng gabi sa agawan sa dalawang semis seat sa MOA Arena.

Ladi itinakas ang Blue Eagles

 Naitakas ng Ateneo de Manila University ang mahirap na 62-60 panalo kontra determinadong University of the East sa UAAP Season 88 men’s basketball tournament na nilaro sa UST Quadricentennial Pavilion Manila, kahapon.

Muling nagtala ng clutch basket si Kymani Ladi para tulungan ang Blue Eagles na ilipad ang malinis na dalawang panalo at hawakan ang tuktok ng team standings.

Naka-ungos ang Katipunan-based squad ng isang puntos, 58-57 nang pumukol ng tres si Wello Lingolingo para agawin ng Red Warriors ang unahan, 58-60 may 31.9 segundo na lamang sa orasan.

Hindi naman nasira ang diskarte ni Ladi, sumagot agad ito ng sariling three pointer para ibalik sa A­teneo ang lamang, 61-60 at lumiit ang oras sa 22 segundo.

May tsansa sanang mabawi ng UE ang bentahe pero naagaw ni Dominic Escobar ang bola mula kay Nico Mulingtapang.

Easy basket sana ni Escobar pero na foul siya ni Lingolingo, unsportsmanlike ang itinawag sa huli.

Nabiyayaan ng free throws at ball possession ang Blue Eagles pero isa lang ang naipasok ni Escobar, at muling nagkaroon ng tsansa ang Red Warriors dahil nagmintis ng dalawang beses si Jaden Lazo.

Kaya lang, nang ma rebound ni Precious Momowei ay diniretso na agad nito ang bola sa kanilang court kaya nagkaroon ng turnover at nasungkit ng Ateneo ang panalo.

Tumikada si 6-foot-10, Ladi ng 18 points at 10 rebounds habang kumana si Joaqui Espina ng 17 markers para sa Ateneo na sunod na makakalaban ang Adamson University sa Linggo ng alas-4:30 ng hapon sa Smart Araneta Coliseum.

Nalasap naman ng Red Warriors ang pangalawang sunod na kabiguan, pagkakataon nilang makaba­ngon sa Linggo rin laban sa defending champion University of the Philippines sa unang laro sa alas-2 ng hapon.