4 bagong events sa NCAA Season 101

 Apat na bagong demonstration events ang idinagdag para sa NCAA Season 101 na magsisi­mula sa Oktubre 1 sa Smart Araneta Coliseum.

Ang mga ito ay ang golf, gymnastics, boxing at weightlifting, ayon kay NCAA Management Committee chairman Melchor Divina ng Mapua.

Ito ay mula na rin sa pakikipagtambal ng NCAA sa Philippine Sports Commission (PSC) na pinamu­munuan ni chairman Patrick ‘Pato’ Gregorio.

Idaraos ang apat na demo events sa second semester na magbibigay sa NCAA ng sapat na panahon para makipagtulungan sa mga National Sports Associations (NSAs) ng golf, gymnastics, boxing at weightlifting.

Inaasahang si Tokyo Olympics gold medalist Hidilyn Diaz ang mangu­nguna sa pagpapatupad sa weightlifting kagaya ng kanyang ginawa sa nakaraang 2024 Batang Pinoy.

Samantala, bagong format ang ipapatupad sa basketball at volleyball tournaments ng NCAA Season 101.

Sinabi kahapon ni Jose Rizal University Management Committee representative Paul Supan na hahatiin ang mga koponan sa dalawang grupo at magkakaroon ng play-in phase kasunod ang quarterfinals at parehong best-of-three series sa semifinals at finals.

Magkakasama sa Group A ng men’s basketball tournament ang NCAA Season 100 champion Mapua Cardinals, Lyceum Pirates, Perpetual Help Altas, Arellano Chiefs at San Sebastian Stags.Nasa Group B ang Season 100 runner-up St. Benilde Blazers, San Beda Red Lions, Letran Knights, Emilio Aguinaldo College Generals at Heavy Bom­bers.

Ito rin ang magkaka­gru­po sa juniors basketball tournament pati na sa volleyball event.

World Challenge may Part 2?

 

Plano ni Asian record holder EJ Obiena na masundan ang pagdaraos ng World Pole Vault Challenge.

Tagumpay ang u­nang edisyon ng torneo na idinaos noong Linggo sa Makati.

Bagama’t masama ang panahon kasabay pa ng protesta ng ilang mamamayan laban sa katiwalian at korapsyon sa gobyerno, hindi nilangaw ang unang edisyon ng World Challenge.

Dumagsa ang mga Pinoy fans para saksihan ang bakbakan ng mga world-class pole vaulters na dumating sa bansa.

Kaya naman masa­yang-masaya si Obiena sa kinalabasan ng torneo.

Nagpasalamat ito sa mainit na pagtanggap ng mga kababayan nito na patuloy ang pagsuporta sa kanyang bawat laban.

Dahil dito, nais ni O­biena na magkaroon pa ito ng Part 2 o Part 3 at maging annual event na.

Hangad din ni Obiena na magkaroon na rin ng women’s edition ang World Challenge upang masilayan din ng mga Pinoys ang mahuhusay na atleta sa women’s division.

“Hopefully, we’ll get a part 2, part 3, and we have this every year. Now we have these athletes to say how good the Philippines is so hopefully next time we’ll bring much more, maybe the women as well,” ani Obiena.

Sa pagtatapos ng torneo, itinanghal na kampeon si Obiena matapos magtala ng 5.80m sa kanyang second attempt.

Sinubukan pa ni O­biena na makuha ang 5.90m na marka ngunit bigo ito sa kanyang tatlong pagtatangka.

Tinalo ni Obiena sa gold medal si Thibaut Collet ng France na nagtala ng parehong 5.80m.

Nakuha ni Obiena ang ginto via countback.

Nagpasalamat din si Obiena sa mga internatio­nal pole vaulters na duma­ting sa bansa para lumahok sa torneo.

Portugal sibak sa Bulgaria

 

Naghulog si Aleksandar Nikolov ng 19 points mula sa 17 attacks, isang block at isang service ace para tulungan ang World No. 13 Bulgaria sa 25-19, 25-23, 25-13 pagwalis sa World No. 22 Portugal papasok sa quarterfinals ng 2025 FIVB Volleyball Men’s World Championship kahapon sa Mall of Asia Arena sa Pasay City.

Tumipa ang kanyang utol na si Simeon ng 19 excellent sets.

Ito na ang best finish ng mga Bulgarians, ang silver medalist noong 1970, sapul noong 2014 edition ng world championship na idinaos sa Poland.

Ito rin ang kauna-una­han nilang Top Eight stint sa torneo matapos noong 2010.

Bigo naman ang mga Portuguese na makaabante sa quarterfinals ng world meet na huli nilang nagawa noon pang 2002.

Nakipagsabayan ang Portugal sa second set, 23-25, bago nabaon sa 6-17 sa third set na tuluyang sinelyuhan ng Bulgaria, 25-13, para kumpletuhin ang straight-set win.

Haharapin ng mga Bulgarians sa quarterfinals ang mananalo sa pagitan ng World No. 4 USA at World No. 6 Slovenia na naglalaro pa kagabi habang isinusulat ito.

Pinamunuan ni Lourenco Martins ang mga Portuguese sa kanyang 10 markers habang may 31 excellent sets si setter Miguel Tavares Rodrigues.

Samantala, sasagupain ng World No. 19 Czechia ang World No. 33 Tunisia ngayong alas-3:30 ng hapon kasunod ang banatan ng World No. 12 Serbia at World No. 16 Iran sa alas-8 ng gabi.

Ang mga Iranians ang dumiskaril sa hangad na quarterfinals appearance ng Alas Pilipinas sa una nilang world meet stint.