Breakup nina Gerald at Julia, kumpirmado na; mga ex ng aktor nakaka-jackpot ng mga bilyonaryo!

 

Kinumpirma na ng Star Magic ang hiwalayan nina Gerald Anderson and Julia Barretto.

Kahapon ay naglabas sila ng statement: “Star Magic confirms that Gerald Anderson and Julia Barretto have mutually decided to end their relationship.

“We request the public to respect their decision and refrain from spreading false narratives.

“Gerald and Julia are grateful to their fans and friends for the love and support,” ang kabuuan ng kanilang statement.

Habang sinusulat namin ito ay wala pa silang post sa kani-kanilang social media pages.

Last May pa sinasabing hiwalay ang dalawa.

Marami ang umasa na sina Gerald at Julia na talaga ang magkakatuluyan, pero hindi nangyari.

Sa kasalukuyan ayon sa reliable source na kinumpirma ng isang kapamilya ng businessman na nasa dating stage si Julia at ang former equestrian at CEO ng RestaurantConcepts Group, Inc. (RCGI) na si Lucas Lorenzo.

Si Lucas ay kapatid ng mister nina Erich Gonzales and Claudia Barretto, sina Matteo and Basti Lorenzo.

At kung miyembro ng alta sociedad/old rich family si Lucas, isang volleyball star naman ang nali-link at sinasabing karelasyon umano ngayon ng actor. Ito ay ang Cignal HD Spiker na si Vanie Gandler.

Bilyonaryo rin ang kasaluku­yang karelasyon ni Bea Alonzo na ex rin ni Gerald, si Vincent Co.

So sinusuwerte ang mga nagiging ex ni Gerald? Napupunta sa mayayaman.

Maaalalang na-label ng ghosting si Gerald nang ma­ging sila ni Julia na hindi pa formal ang breakup nila ni Bea.

Pangarap ng Alas nadiskaril

 Abot-kamay na ng World No. 82 Alas Pilipinas ang makasaysayang pag­lalaro sa Round of 16 ng 2025 FIVB Volleyball Men’s World Championship.

Subalit diniskaril ito ng World No. 16 Iran matapos ilusot ang dramatikong 21-25, 25-21, 17-25, 25-23, 22-20 panalo sa Pool A kahapon sa Mall of Asia Arena sa Pasay City.

Muling ipinakita nina veterans Bryan ‘Bazooka’ Bagunas at Marck Espejo at rookie Leo Ordiales ang kanilang puso para sa mga Pinoy spikers na gumawa ng kasaysayan matapos talunin ang World No. 23 Egypt, 29-27, 23-25, 25-21, 25-21, noong Martes.

Ito ang kauna-unahang panalo ng isang Philippine team sa world volleyball championship.

“Una, siyempre ma­lungkot kasi natalo. Pero natutuwa pa rin ako kasi hindi naman namin ine-expect na aabot kami dito,” sabi ng 27-anyos na si Bagunas. “Sobrang proud ako sa mga bata kasi talagang nag-step up sila sa game na ito.”

“Siguro para sa akin ang mababaon kong aral ay mas maging matured pa at babaunin ko iyong experience ko dito,” dagdag ng 22-anyos na si Ordiales. “Masasabi ko lang, kaya nating mag-compete internationally.”

Lalabanan ng Iran sa knockout phase ang World No. 12 Serbia sa Martes sa Pasay City venue.

Ang mga Iranians na lamang ang natirang kinatawa ng buong Asya sa FIVB Worlds matapos masibak ang Alas Pilipinas, Japan, South Korea at China.

Inilista ng Alas Pilipinas ang 2-1 bentahe matapos kunin ang third set, 25-17.

Nakatabla ang Iran sa fourth frame, 25-23, para makahirit ng fifth set kung saan nila kinuha ang 10-4 bentahe.

Nakatabla ang mga Pinoy spikers sa 10-10 at ilang beses nagkaroon ng pagkakataong selyuhan ang panalo, ang huli ay sa 19-18 kung saan nanalo ang Iran sa isang net fault challenge sa kill block sana ni Kim Malabunga kay Ali Hajipour.

At mula rito ay tuluyan nang inangkin ng mga Iranians ang 22-20 panalo.

Isko inihain kay Pangulong Marcos Drainage Master Plan ng lungsod

 Pormal nang isinumite ni Manila City Mayor Francisco “Isko Moreno” Domagoso kay Pangulong Ferdinand “Bongbong” Marcos Jr. ang Drainage Master Plan ng lungsod bilang suporta sa kampanya ng pamahalaan na masolusyunan ang pagbaha.

Ito’y kasabay ng pagbisita ng Pangulong Marcos sa Gen. Vicente Lim Elementary School sa Tondo, kung saan isinagawa mga relief operations sa 2,253 families at namahagi ng tig P15,000 sa mga nasunugan sa Barangay 105, Happyland. Kasama rin nina Marcos at Domagoso sina Vice Mayor Chi Atienza at Congressman Ernix Dionisio.

Inabisuhan naman ng Pangulong Marcos si Domagoso na makipag ugnayan sa Department of Public Works and Highways (DPWH) at sa Metro Manila Development Authority (MMDA) drainage master plan ng lungsod.

Samantala, inilahad  din ni Domagoso ang operations plan ng lungsod kaugnay ng inaasahang mass protests sa Set­yembre 21 sa Luneta.

Ayon sa alkalde, handa na ang Manila Police District (MPD) upang masiguro ang kaligtasan ng mga protesters at publiko.

“Rest assured that the City Government of Manila stands ready to work with your administration in pursuit of sustainable development and the well-being of our people,” ani Domagoso.