Mag-asawa huli sa panunuhol sa complainant sa ‘missing sabungeros’

 

Arestado sa entrapment operation ng Criminal Investigation and Detection Group (CIDG) ang mag-asawang nanuhol umano sa isang complainant sa kaso ng ‘missing sabungeros’ sa Rizal.

Sa press birefing sa Camp Crame, sinabi ni CIDG Director Maj. Gen. Robert Morico II, sina alyas “AJ” at alyas “Tina” ay dinakip sa entrapment operation bandang alas-11 ng umaga nitong Lunes sa Brgy. Dolores, Taytay, Rizal.

Ayon kay Morico, ang panunuhol ng P1.5 ­milyon ng mga suspek ay kapalit ng pagbawi ng isa sa mga complainant ng kanyang reklamo hinggil sa nawawalang sabungero.

“We confirm that there is someone who wants to intervene in the said missing sabungeros case by bribing one of the complainants to recant her earlier case filed at the National Prosecution Service,” ani Morico.

Nabatid na humingi ng tulong ang nasabing complainant sa tanggapan ng CIDG at ipinaalam ang panunuhol ng mga suspek.

Lumilitaw na mala­yong kamag-anak ng ­complainant ang mga suspek.

Nag-alok ng malaking halaga ng pera ang dalawang suspek kapalit ng pananahimik nito, hindi na pagdalo sa anumang patawag ng korte sa isyu ng missing sabungero at pag-atras nito ng reklamo sa DOJ laban sa negosyanteng si Charlie “Atong” Ang at iba pang personalidad na inuugnay sa pagkawala ng mga sabungero.

Inutos naman ni PNP acting chief Lt. Gen. Jose Melencio Nartatez Jr., ang masusing imbestigasyon dahil naniniwala umano siya na may nag-utos sa mga suspek.

Nasa kustodiya na ng CIDG ang mag-asawa na nahaharap sa kasong paglabag sa Article 286 (Grave Coercion) of the Revised Penal Code and Presidential Decree 1829 (Obstruction of Justice).

Gabriela partylist, proklamado na

  Iprinoklama na ng Commission on Elections (Comelec) ang Gabriela Women’s Party bilang isa sa mga nanalong partylist group sa katatapos na May 12, 2025 midterm elections.

Nabatid na ang proklamasyon sa Gabriela ay isinagawa sa Comelec main sa Intramuros, Manila, kahapon.

Si Gabriela First Nominee Sarah Elago ang tumanggap ng certificate of proclamation mula sa Comelec, na tumatayo bilang National Board of Canvassers (NBOC).

Noong Linggo, una nang inianunsiyo ni Comelec Chairperson George Erwin Garcia na ang Gabriela ang makakakuha ng ika-64th party-list seat sa Kamara. 

Bilang pagtalima ito sa constitutional requirement na ang mga partylist representatives ang siyang bubuo ng 20% ng membership ng Kamara.

Ang Gabriela ay nakakuha ng kabuuang 256,811 boto sa midterm polls.

VP Sara bumisita sa Senado

Nagtungo si Vice President Sara Duterte sa Senado kung saan nagtungo siya sa tanggapan nina Senators Rodante Marcoleta at Ronald “Bato” dela Rosa.

Unang nagtungo si Duterte sa tanggapan ni Marcoleta kung saan pumasok din ang iba pang “Duterte senators” na sina Senators Bong Go at Imee Marcos.

Kasunod na binisita ni Duterte ang tanggapan ni Dela Rosa kung saan nagtagal siya ng ilang minuto.

Nauna rito, ipinagpaliban ng Senado ang pagdinig sa budget ng Office of the Vice President at itinakda ito sa Lunes, Setyembre 22.

Tumanggi si Duterte na sagutin ang mga tanong ng media dahil “boarding” na aniya siya at magtutungo sa Sultan Kudarat.

Nangako si Duterte na magpapa-interview sa media pagkatapos ng kanyang biyahe.

Tumanggi naman si Dela Rosa na magbigay ng detalye sa kanilang naging kuwentuhan ng Bise Presidente.