Escudero, Binay ikinanta sa ‘kickback’ sa flood scam

  Pinangalanan ni ­dating Department of Public Works and Highways (DPWH) under­secretary Roberto Bernardo sina Sen. Francis “Chiz” Escudero, at ­dating senador Nancy Binay sa maanomalyang flood control projects.

Sa pagharap sa Se­nate Blue Ribbon, binanggit din ni Bernardo sina dating senador Ramon “Bong” Revilla Jr., Ako Bicol Rep. Zaldy Co, Commission on Audit (COA) Commissioner Mario Lipana at DepEd Undersecretary Trygve Olaivar at sina dating DPWH district engineers Henry Alcantara at Asst. Dist. Engr. Brice Hernandez.

Sa kanyang affidavit, sinabi ni Bernardo na siya ang personal na nag-deliver ng cash sa isang “Maynard Ngu” na para diumano kay Escudero. Si Ngu aniya ay malapit na kaibigan at campaign contributor umano ni Escudero.

“Maynard Ngu asked me to submit a list of projects. I personally submitted a list of projects to Maynard Ngu and some of the items therein pertaining to Valenzuela and Marinduque projects were subsequently included in the GAA ­(General Appropriations Act),” sabi ni Bernardo.

Nang maibigay na ang listahan ng mga proyekto tinanong ni Bernardo si Maynard kung okay na ang “20 percent”.

“Maynard said “Okay”. After inclusion of the projects in the GAA, I delivered 20% of approximately P800 million or about P160 million to Maynard Ngu which was meant for Sen. Escudero,” dagdag niya.

Una namang nakilala ni Bernardo si Rep. Co nang personal siyang tinawagan ng mambabatas para tanungin kung maayos bang kausap si Alcantara — na sinagot niya ng “oo”.

Humihingi umano si Co ng 25% komisyon at 2% ang paghahatian nila ni Alcantara.

Samantala ayon kay Bernardo, si Olaivar ay dating nagtrabaho sa opisina ni Revilla bago lumipat sa opisina ni dating senator Sonny Angara.

“Sometime in 2024, Usec. Olaivar personally called me for a meeting to discuss unprogrammed appropriations supposedly for the office of the Executive Secretary,” sabi ni Bernardo.

Nagkasundo siya at si Olaivar sa 15% cut mula sa P2.85 bilyong halaga ng proyekto. Dinala umano ni Bernardo ang nasabing halaga kay Olaivar sa Makati at iba pang lokasyon.

Nakausap naman niya si Revilla noong 2024 nang magbigay siya ng listahan ng mga proyekto mula kay Alcantara.

“Sen. Revilla asked for a commitment, which I suggested, then he approved at 25 percent of the total amount of projects indicated in the list,” sabi ni Bernardo.

“I relayed the 25 percent commitment to Engr. Alcantara and told him that Sen. Revilla will appreciate additional contributions for his ­senatorial re-election bid,” dagdag pa ni Bernardo.

Umabot umano sa P125 milyon ang ­nakolekta ni Alcantara para kay Revilla na idiniliber sa Cavite.

Isinalaysay din ni Bernardo na nakilala naman niya si Binay sa pamamagitan ng aide nito na si Carleen Villa.

“Sometime in the year 2024, Carleen Villa called me and asked for a commitment which was set at 15 percent of the total amount of the projects indicated in the list,” sabi ni Bernardo.

Si Alcantara umano ang nag-deliver ng P37 milyon sa bahay ni Binay sa Quezon City.

Kinumpirma rin ni Bernardo na nag-request si COA Commissioner Mario Lipana na magkaroon ng proyekto para sa DPWH Bulacan 1st District sa pamamagitan ni Engineer Brice Hernandez. Pero hindi tiyak ni Bernardo kung nakakuha ng proyekto si Lipana.