Discayas, 3 ex-DPWH execs pasok sa ‘witness’ - DOJ

 

 Ikinokonsidera na ng Department of Justice (DOJ) na protected witnesses ang 3 opisyal ng Department of Public Works and Highways (DPWH) at mag-asawang kontratista na sina Curlee at Sarah Discaya.

Sinabi ni Justice Secretary Jesus ­Crispin Remulla nitong Miyerkules na ang mga dating DPWH engineers na sina Henry Alcantara, Brice Hernandez, at Jaypee Mendoza at mag-asawang Discaya ay kailangang mabigyan ng proteksyon upang magtuluy-tuloy ang mga pagbubunyag nila.

“Kasama iyan sa evaluation, pero we consider them already protected witnesses iyong tatlong taga-DPWH so far na nagsasalita sa amin are considered protected witness. We just wrote a letter to the Senate President about that status,” ani Remulla.

“Ang protected witness kasi, kaya ginawa ang witness protection program, para ang mga testigo sa mga kaso ay hindi masaktan at hindi pagtangkaan ang buhay, kaya iyan ay isang katungkulan na aming tinutupad,” aniya pa.

Nilinaw ni Remulla na hindi pa naman sila maituturing na state witnesses dahil marami pang parameters na dapat gawin bago sila maging state witnesses.

“Pwede na rin silang protected witness, iyan ang susunod naming aanuhin. Pero iyong state witness status kasi, we are very careful about that, it takes a lot of doing to declare a person a state witness,” paliwanag niya.

Tatlong engineers ang nauna nang nagpunta sa DOJ para sa ebalwasyon ng kanilang mga aplikasyon sa Witness Protection Program (WPP) kasunod ng mga pinakawalang impormasyon sa Senate Blue Ribbon Committee na nagbunyag pa ng ilang mga mambabatas sa diumano’y “insertions” at “kickbacks” sa flood control projects.

P4.7 bilyong eroplano, chopper ni Zaldy Co pina-freeze ng DPWH

 

Hiniling ng Department of Public Works and Highways (DPWH) sa Anti-Money Laundering Council (AMLC) na isyuhan nito ng freeze order ang tinatayang nasa P4.7 bilyong air asset ni Ako Bicol Partylist Rep. Elizaldy ‘Zaldy’ Co at ng kanyang kapatid na si Christopher Co.

Ito ay bilang bahagi nang pagsusumikap ng pamahalaan na mabawi ang mga umano’y ill-gotten assets ng mga taong sangkot sa maano­malyang flood control projects sa bansa.

Sa pulong balitaan kahapon, sinabi ni DPWH Secretary Vince Dizon na nagsumite ang Civil Aviation Authority of the Philippines (CAAP) ng listahan ng air assets na nakarehistro sa Misibis Aviation & Development Corp., na pinamumunuan ng anak ni Zaldy Co na si Michael Ellis.

Nasa kabuuang $74.650 milyong halaga ng aircraft, kabilang ang isang $36-milyong Gulfstream 350 at $16-­milyong Agusta Westland AW1399, na nakarehistro sa Misibis Aviation.

Ang Hi-Tone Construction and Development Corp. naman ni Christopher Co ay mayroong kabuuang $7.940 milyong halaga ng registered air assets sa CAAP, gaya ng isang $6.9-million Augusta A109E.

Bukod dito, humihingi rin ang DPWH ng freeze order sa $2-milyong Bell 505 aircraft na nakarehistro sa QM Builders, na kabilang sa Top 15 contractors na una nang ibinunyag ni Pang. Ferdinand Marcos Jr. na nakakuha ng malaking halaga ng proyekto sa pamahalaan, at pinamumunuan ng isang certain Allan Quirante.

Una nang hiniling ng DPWH sa CAAP, Land Transportation Office (LTO), Land Registration Authority (LRA), at Maritime Industry Authority (MARINA) na bigyan sila ng full inventory ng mga motor vehicles, lands, water vessels at maging aircraft na rehistrado sa ilalim ng mga pangalan ng mga opisyal ng DPWH at mga contractors.

Ani Dizon, isusumite nila sa DPWH ang listahan ng mga naturang air assets sa AMLC para sa posibleng pag-freeze sa mga ito.

Zaldy Co ‘di papadalhan ng imbitasyon ng Senado

 

 Hindi papadalhan ng imbitasyon ng Senate Blue Ribbon Committee si Ako Bicol Partylist Rep. Elizaldy Co kahit na itinuturong kumita siya umano ng bilyun-bilyong piso mula sa flood control scandal.

Ayon kay Senate President Pro Tempore Panfillo “Ping” Lacson, naabutan na niya sa Kongreso ang tradisyon kung saan hindi iniimbitahan sa pagdinig ang miyembro ng Kongreso dahil sa tinatawag na “inter-parliamentary courtesy.”

“He (Co) is still a congressman…merong tradition voluntary he can appear and testify or manifest pero to send invite or subpoena hindi proper,” ani Lacson.

Sinabi rin ni Lacson kahit na sobrang bigat ang alegasyon kay Co, hindi pa rin “proper” na pilitin itong dumalo o padalhan ng subpoena.

Pero sinabi rin ni Lacson na bukas ang komite kay Co sakaling nais nitong dumalo sa pagdinig at ibigay ang kanyang panig sa isyu.

Sa pagdinig ng komite noong Martes sinabi ni dating DPWH Bulacan 1st District assistant district engineer Brice Hernandez na nasa P1 bilyong cash na naka-impake sa 20 maleta ang isinakay nila sa anim hanggang pitong van para ihatid kay Co sa Shangri-La Hotel sa Taguig.