Maximum tolerance ng mga pulis sa September 21protest, pinuri ng Napolcom

 

 Pinuri ni National Police Commission (Napolcom) ang ipinakitang maximum tolerance ng Philippine National Police (PNP) sa ikinasang rally sa Trillion Peso March.

Ayon kay Napolcom chief Commissioner Rafael Calinisan, nagpapasalamat ang kanilang hanay sa hindi matatawarang serbisyo ng mga pulis para mapanatili na maayos ang rally. 

Nakalulungkot ayon kay Calinisan na may ­ilang grupo ang nanggulo at gumamit ng Molotov cocktails at binato ang mga pulis sa bahagi ng Ayala Bridge sa Maynila.

Nakatanggap pa ng mensahe si Cali­nisan mula sa officer sa ground.

Sinaluduhan ni Calinisan ang mga pulis sa pagpapatupad ng maximum tolerance sa kabila ng extreme provocation ng mga rallyista. Bilib si Calinisan sa katapa­ngan, propesyunalismo at resilience ng mga pulis.

“Let us give tribute to the men and women in uniform who, despite danger and injury, fulfilled their sworn duty to safeguard lives and maintain order. Their sacrifice reflects the PNP’s unwavering commitment to peace, discipline and service to the community. Kasama ako sa napakaraming Pilipino na nagpapasalamat sa inyong serbisyo. They are truly the protectors of the people.Thankless job ang pagiging pulis. They are always put in harm’s way and their efforts often go unnoticed. But with what happened with the rallies, their sacrifices are brought to the people’s attention. And the people are appreciative of their selfless service,” pahayag ni Calinisan.

Tiniyak pa ni Calinisan ang publiko na mananatiling nakaalerto ang law enforcement agencies sa anumang tawag ng emergencies.

Abogado, ex-pulitiko, nagpondo sa ‘bogus’ na raliyista - Isko

 

Tahasang sinabi ni Manila Mayor Francisco ‘Isko Moreno’ Domagoso na bineberipika nila ang impormasyon na isang abogado at dating pulitiko ang nagpondo sa mga ‘bogus’ na raliyista na nanggulo noong Linggo sa Ayala Bridge at  sa Mendiola sa Maynila.

“Mayroong mga initial report, sketchy pa, may dating pulitiko, Filipino-Chinese ang funder. Tapos may isang abogado, funder din ng mga bata na ‘yun kagabi,” ani Domagoso.

Ayon kay Domagoso, hindi niya palalampasin ang pambababoy ng mga raliyista sa Maynila kung saan nag-spray paint sa center island, mga establisimyento at pinagsisira ang mga traffic lights at railings.

Aniya, papanagutin niya isa-isa ang mga naaresto ng Manila Police District (MPD) matapos ang gulo. Nasa 216 na ang mga dinakip at kakasuhan ng  MPD.

Hind naitago ni Domagoso ang galit at pagkadismaya sa kanyang ginawang inspeksiyon sa kahabaan ng Recto Ave.

Mula Mehan Garden, Universidad de Manila hanggang Liwasang Bonifacio sa Lawton, bi­naboy ng mga nanggugulong mobster ang ating mga pader at pasilidad gamit ang spray-paint.

“Kinukuwestiyon ninyo ung pondo ng pamahalaan, ang gagamitin natin sa paglilinis at pagsasaayos pera rin ng taong bayan”, ani Domagoso.

Tinatayang umabot sa milyun-milyong piso ang pinsalang idinulot ng protesta sa Maynila, kabilang ang mga center island, traffic lights, at sangkatutak na vandalism na isinasaayos na ng lungsod.

216 rioters na naaresto kakasuhan ng sedition

 Nakatakdang sampahan ng kasong sedition ng Pamahalaang Lungsod ng Maynila ang nasa 216 rioters na naaresto ng Manila Police District (MPD) matapos na manggulo, manakit ng mga pulis at manunog ng trailer truck sa pagsasagawa ng  September protest sa  Mendiola at Ayala Bridge sa Maynila.

Ito naman ang inanunsiyo ni Manila City Mayor Francisco “Isko Moreno”Domagoso matapos na makita ang danyos sa mga government property ng mga 216 rioters na kinabibilangan ng 127 adults at 89 na minors. Ani Domagoso, kaila­ngang managot ang mga ito dahil sa pamemerwisyong kanilang ginawa sa mga mamamayan ng lungsod.

“May sinira sila, pi­nerwisyo nila ang pri­bado at nananahimik na komunidad, pananagutan nila. Managot sila sa mga ginawa nilang bagay,” anang alkalde.

Nagsasagawa na ng imbestigasyon ang mga awtoridad hinggil sa ulat na ilang rioters ang binayaran upang sadyaing manggulo sa lungsod. May mga napabalita  aniyang mga instigator o nagplano na magbigay ng pera o funding sa ilang mga indibidwal na nanggulo. Ipinauubaya na ni Domagoso sa MPD ang  imbestigasyon.

Samantala, du­magsa naman sa MPD Headquarters ang mga magulang ng mga inaresto. Ayon sa pahayag ng ilang mga magulang, sumama lamang ang kanyang anak na kambal dahil sa barkada. Posible aniyang hindi alam ng kanyang mga anak ang pupuntahan.

Hinikayat  na lamang ni Domagoso ang mga  magulang ng mga kabataan na kaagad na makipag-ugnayan at makipagtulungan sa mga pulis upang ituro kung sino ang taong nasa likod ng naturang kaguluhan.

“Sa mga magulang ng mga suspek, kung ako sa inyo, kausapin niyo na ang mga anak ninyo at tulungan ang mga pulis na ituro na kung sino ang mga tao behind this. [Kung hindi], kayo lang ang babalikat sa problemang binigay ninyo sa Maynila na inyong pananagutan sa batas,” babala pa ng alkalde.

Dagdag pa ng alkalde na makikita ang pagkakaiba ng mga lehitimong raliyista at mga nagnanais na  manggulo . “All of the sudden, from Cavite, Taguig, Pasay, Parañaque, ­Quezon City, Caloocan, na mga kabataan, ito yung mga nanggulo na noong gabi,” dagdag pa niya.

Samantala, sinabi naman ni  MPD Spokesperson PMajor. Philip Ines na nananatili silang alerto  kasunod nang naganap na magulong rally sa ilang lugar sa Maynila nitong Linggo, na sinasabing posibleng isinagawa ng isang grupo ng ‘hip-hop gangsters’.