Jinggoy tinabla ng Sandiganbayan sa PDAF scam

Ibinasura ng Sandiganbayan ang motion for reconsideration ni Senador Jinggoy Estrada sa kanyang graft case kaugnay ng P200 milyong Priority Development Assistance Fund (PDAF) scam.

Ayon sa desisyon ng Sandiganbayan Special Fifth Division, sapat ang ebidensiyang iniharap ng prosekusyon kaugnay ng naturang pork barrel scheme na kinasasangkutan din ni Janet Napoles. Dahil dito, magpapa¬tuloy umano ang paglilitis at pagtatag ng prima facie case laban kay Estrada, at inatasan din siyang iharap ang kanyang depensa sa pagpapatuloy ng trial.

Binigyang halaga ng Sandiganbayan ang testimonya ni Ruby Tuason, dating aide ni dating Pa¬ngulong Joseph “Erap” Estrada, at whistleblower Benhur Luy, na nag-ugnay kay Estrada sa mga pagpupulong, pag-apruba ng mga proyekto at pag-endorso sa mga nonprofit organization (NGO) ni Napoles.

Tinukoy rin ng korte ang paper trail na nagpapakitang paulit-ulit na iniendorso ni Estrada ang mga Napoles-linked NGO, na naging maha¬laga sa pagpapatupad ng umano’y maanomalyang proyekto. Bukod sa PDAF scam, matatandaang nahaharap din si Estrada sa hiwalay na alegasyon na tumanggap siya ng 30% kickback mula sa P300 milyong flood control project, kung saan nadawit din si Senador Joel Villanueva sa umano’y kickback sa P600 milyong proyekto sa Bulacan. 

 

Comelec prinoklama 3 party-list cong

 Iprinoklama ng Commission on Elections (Comelec) nitong Huwebes ang mga first nominee ng Abono, Ang Probinsyano, at Murang Kuryente party-list groups bilang ookupa sa tatlong huling upuan sa Kamara de Representantes.

Sa seremonya na isinagawa sa Come¬lec Main Office sa Intramuros, Manila, prinoklama ng Commission en banc, umuupo bilang National Board of Canvassers (NBOC), sina Robert Estrella ng Abono, Alfred delos Santos ng Ang Probinsyano, at Arthur Yap ng Murang Kuryente. 

Sa nakaraang halalan, nakakuha ang Abono ng 254,474 boto; Ang Probinsyano naman ay nakalikom ng 250,886 boto; at ang Murang Kuryente ay 247,754 boto.

Nakapasok ang tatlong party-list group sa winning circle matapos na idiskuwalipika ng Comelec ang Duterte Youth party-list, na magkakaroon sana ng tatlong upuan sa Kamara.

Nitong Setyembre 30, pinal nang kinansela ng Comelec ang registration ng Duterte Youth party-list.

Pinanumpa na rin sa Kamara ang tatlong kongresista nitong Huwebes, Oktubre 2.

Alice Guo, pamilya tinadtad ng kaso sa biniling lupa

 

Nagsampa ng kaso ang NBI-Bulacan laban sa da¬ting Bamban, Tarlac Mayo¬r Alice Leal Guo o Guo Hua Ping, at sa kanyang pamilya dahil sa pagtatayo ng mga kompan¬ya at pagbili ng lupa sa Marilao, Bulacan.

Sa imbestigasyon, luma¬bas na sina Alice at mga kapatid niyang sina Shiela (Mier Zhang) at Siemen Guo ay nagkunwaring Pilipino para makapagtayo ng negosyo. Kasama rin nila sina Guo Jian Zhong at Lin Wen Yi bilang incorporator. Ayon sa NBI, kabilang sa itinayong kompanya ang QJJ Group of Companies, QSeed Genetics, QJJ Meat Shop, QJJ Slaughter House, QJJ Smelting Plant, at QJJ Embroidery Center. Lahat ito ay nakarehistro sa iisang address sa Marilao, Bulacan, sa lupang binili ni Guo noong 2010 sa halagang P2 milyon.

Nadiskubre ring pineke nila ang mga Articles of Incorporation, Secretary’s Certificate, General Information Sheet at mga permit, pati ang Deed of Sale ng lupa.

Dahil dito, kinasuhan sila ng 30 bilang ng falsification of public documents, 30 bilang ng Anti-Dummy Law violation, apat na bilang ng pamemeke ng business at building permits, at karagdagang anim na kaso ng falsification laban kay Alice Guo. Pinuri ng NBI ang kanilang mga ahente sa masusing imbestigasyon na nagbunyag ng mga pekeng negosyo at dokumento ng pamilya Guo.