Solb na kay Bronny! LeBron James dehins na hihintayin sa NBA si Bryce

 AMA na raw si Bronny, hindi na hihintayin ni LeBron James na makalaro pa sa NBA ang isa pang anak na lalaking si Bryce.

Freshman pa lang sa Arizona ngayong taon si Bryce, noong nakaraang season, natupad ang pangarap ni LeBron na makalaro ang panganay na si Bronny, naging teamamtes ang mag-ama sa Los Angeles, hinugot ng Lakers si Bronny bilang 55th pick overall noong 2024 draft.

“I am not waiting on Bryce,” paglilinaw ni James sa media day ng Lakers nitong Lunes, via Dan Woike ng The Athletic. “I don’t know what his own timeline is. I got my timeline, and I don’t know if they quite match up.”

Mukhang papunta na sa finish line ng career si LeBron, 40, ngayong 2025-2026 NBA ay papasok na sa kanyang record 23rd season.

Aminado siyang igagarahe na rin ang jersey, hindi lang nagbigay ng konkretong sagot kung kailan.

“Sooner than later,” aniya raw, ayon kay Woike.

Motibasyon daw ni James na makalaro pa sa kanyang kasibulan si Luka Doncic, 26, dumating sa LA si Doncic noong February sa blockbuster trade mula Dallas kapalit ni Anthony Davis.

“The motivation to be able to play alongside (Luka) every night? That’s super motivating,” ani James. “That’s what I’m gonna train my body for. Every night that I go out there, and try to be the best player I can for him, and we (gonna) bounce that off one another.”

Forthsky Padrigao, Nic Cabañero ibabala uli ng UST Growling Tigers

 

IPAGPAPATULOY nina Forthsky Padrigao at Nic Cabañero ang pananalasa ng host University of Santo Tomas (UST) sa pagsagupa nito sa National University (UST) na kapwa asam samahan ang pahingang Ateneo sa tuktok ng UAAP Season 88 collegiate men’s basketball standings ngayong Miyerkoles sa UST Quadricentennial Pavilion Arena.

Magbabalik sa pugad ng Growling Tigers ang mga laro na inaasahang gagamitin ng squad ni coach Pido Jarencio ang homecourt advantage laban sa Bulldogs na sabik makabangon matapos ang mga nakakadismayang kampanya nakaraang season sa ganap na alas-4:30 ng hapon.

Itinala ng UST ang dalawang matinding sorpresa sa torneo matapos na putulin ang siyam na sunod na pagkatalo sa defending champion University of the Philippines (UP) at tinapos ang 16 sunod-sunod na kabiguan sa runner-up noong nakaraang taon na De La Salle.

Nakatuon ang Growling Tigers sa kanilang unang 3-0 simula mula noong 2015, ang taon na huli itong nakarating sa Finals bitbit ang programang nakabase sa España.

Nagpamalas ng pamumuno sina Padrigao at Cabañero, habang ang Nigerian rookie center na si Collins Akowe ay naging dominanteng puwersa sa panalo ng UST.

Nag-average si Akowe ng 24.5 points at 18 rebounds sa kanyang dalawang laro upang parusahan ang mga Fighting Maroons at Green Archers. Si Padrigao ang muling nagsasaayos ng opensa, kung saan tinanggap ni Cabañero ang papel ng sandigan ng samahan.

“These guys are good. I don’t think we’ll have a hard time grounding them because I talk to them off the court and always ask what they can improve on. We just have to keep grounded, we just have to stick to what we’re doing,” sabi ni Growling Tigers assistant coach Peter Martin.

Para sa NU, sa wakas ay mayroon nang malusog na listahan si coach Jeff Napa matapos buksan ang season sa 2-0. Ngunit inamin niyang maraming bago ang Bulldogs bago tunay na maituturing na Final Four contenders.

“Number one siyempre iyung consistency namin. Day in and day out, iyung approach namin, it should be all about effort. How we put iyung effort na ibinibigay namin and kung paano kami magiging consistent day in and day out,” sabi ni Napa.

“We will start again in practice, we will try to put in an effort again to stay sharp and stay positive kasi hindi biro iyung parating pa na mga kalaban namin. We need to be ready, and we need to stay healthy pa rin. Iyun ang number one concern para magawa namin ang gusto naming gawin,” sabi pa nito.

Ang Bulldogs ay sasandal nang husto sa Senegalese center na si Omar John, na may average na 12 puntos at 5.5 rebounds bawat laro, habang haharap siya kay Akowe sa isang inaabangang laban. Para kay Akowe, ito ang unang beses na makakalaban niya ang dati niyang alma mater sa high school.

Buwis, trabaho sigurado sa regulated gaming—Malayang Konsyumer

 Nanindigan ang Malayang Konsyumer na ang pagpapatatag ng licensed and regulated online gaming platforms ay hindi lamang para sa kaligtasan ng mga manlalaro kundi malaking tulong din sa ekonomiya ng bansa sa anyo ng buwis at trabaho.

Para sa pro-consumer group, mas nakikinabang ang publiko sa legal na industriya kumpara sa paglaganap ng mga iligal na operator na walang ambag sa bayan. “Kapag sa regulated platforms naglalaro ang tao, mas ligtas dahil may malinaw na safeguards tulad ng age verification, deposit limits, self-exclusion tools, help hotlines, at proteksyon sa personal data at player funds,” ayon kay Mark Jansen Magsano, convenor ng Malayang Konsyumer.

Idinagdag pa niya na sa datos ng Philippine Amusement and Gaming Corporation (PAGCOR), halos kalahati ng gaming revenues sa first quarter ng 2025 ay galing sa licensed operators. Bukod sa buwis, libu-libong trabaho rin aniya ang naibibigay ng mga kumpanyang ito sa mga Pilipino.

Binanggit din ng grupo na ang mga legal na kumpanya ay namumuhunan sa teknolohiya at responsible gaming programs para mapanatiling kontrolado at mas ligtas ang paglalaro. Samantala, sinabi ni Magsano na ang mga iligal na operator ay walang pakialam sa kapakanan ng mga manlalaro at hindi nagbabayad ng buwis na sana’y napupunta sa serbisyo publiko at imprastruktura sa edukasyon.

Para sa Malayang Konsyumer, bawat pisong napupunta sa illegal sites ay direktang kawalan para sa kaban ng bayan, at lalo lamang daw nitong pinapalakas ang mga sindikato na umaabuso sa kahinaan ng mga manlalaro habang iniiwasan ang pananagutan.

Nananawagan ang grupo sa pamahalaan at enforcement agencies tulad ng National Telecommunications Commission, Department of Justice, National Bureau of Investigation, at Philippine National Police na mas paigtingin pa ang pagtutulungan upang masawata ang mga ilegal na operasyon.

Anila, hindi total ban ang solusyon kundi ang pagpapatibay sa legal and regulated platforms para maprotektahan ang publiko at mas mapakinabangan ng ekonomiya ang buwis at mga trabahong nalilikha ng industriya.