P1.38B `winalis’ ng 2 bagyo, habagat sa agri

 

Umabot na sa P1.38 bilyon ang pinsala sa agrikultura at imprastruktura dulot ng magkasunod na Bagyong Mirasol at Nando na sinabayan pa ng habagat sa siyam na rehiyon sa bansa, ayon sa Department of Agriculture (DA).

Nasa 55,595 na mga magsasaka at farm workers ang apektado matapos salantain ng mga bagyo at habagat ang 47,723 ektarya ng kabukiran.

Ayon sa DA, nasa 109,997 tonelada ng palay, mais, high-value crops, hayop, at manok ang nawala at hindi pa kasama sa bilangan ang pinsalang dala ng Bagyong Opong na katatapos lang humagupit sa bansa, partikular sa Mindoro at Masbate.

Inutusan na ni Agriculture Secretary Francisco Tiu Laurel Jr. ang mga regional office at ang Philippine Crop Insurance Corporation (PCIC) na bilisan ang pagkuwenta ng pinsala at inatasan din niya ang National Food Authority na maglabas ng bigas para sa relief operations.

Naglaan ang PCIC ng P236 milyon na pambayad sa claims ng 25,800 na mga magsasaka. Sa naturang halaga ay P206M ang para sa palay.

Ayon sa DA, may 17,600 na mga insured farmer mula sa Ilocos at Cagayan Valley.

“Early next week we will submit our impact assessment for Opong,” sabi ni PCIC President Jovy Bernabe. (Eileen Mencias)

Pulong Duterte: Trillanes nag-check kay Digong sa ICC

 

Naniniwala si Davao City Rep. Paolo “Pulong” Duterte na si dating Senador Antonio “Sonny” Trillanes IV ang ipinadala ng pamahalaan para mag-“welfare check” kay dating Pangulong Rodrigo Duterte sa International Criminal Court (ICC).

Sa kanyang Facebook post nitong Sabado, Setyembre 27, mariing binatikos ng mambabatas ang umano’y pagbisita ni Trillanes sa ICC at pinatamaan ang administrasyon sa isinagawang “welfare check” sa kanyang ama.

Dagdag pa niya, “Baka magkalat ka ng virus mo dyan at di ka pa naman na inject ng anti rabies shot mo,” banat pa ni Duterte

Nagbabala pa ito kay Trillanes huwag umanong mag-aalala dating senador dahil masasadlak din ito sa selda at hintayin na lamang na mangyari ito sa kanya.

Kinonek pa nito sa flood control fund ang ibinayad umano kay Trillanes para tingnan ang sitwasyon ng dating pangulo.

Noong Miyerkoles, Setyembre 24, pinalagan ng kanyang kapatid na si Vice President Sara Duterte ang umano’y welfare check sa kanilang ama na isinagawa ng mga opisyal ng Philippine Embassy. Aniya, iniuulat raw nila ito kay Pangulong Ferdinand Marcos Jr.

Tugon naman ng ICC, lahat ng bumibisita sa detention facility ay may pahintulot o mismong hinihiling ng nakadetine, ayon sa kanilang tuntunin.

Samantala, pinost naman sa social media ni Trillanes ang isang larawan kung saan ipinakitang nasa harap siya ng ICC.

“Relax lang po. Nasa loob pa si Duts. Nagha-hanapbuhay lang ang abogado niya,” ani Trillanes.

Base sa ulat ng Politiko, pumunta si Trillanes sa The Hague, Netherlands mula Setyembre 16 hanggang 18 bilang delegado sa Tenth Seminar on Cooperation sa ICC. Isa siya sa 32 delegado mula sa 19 na bansa sa tatlong araw na seminar.

Tinalakay sa seminar ang pagpapahusay ng kooperasyon sa imbestigasyon, witness protection, at post-trial procedures.

Isa si Trillanes sa masigasig na nagpasimula ng reklamo sa ICC laban kay Duterte kaugnay ng giyera kontra droga sa ilalim ng administrasyon nito. (Angelika Cabral)

Dinikdik ni Ping Lacson sa kapabayaan: DBM-Pangandaman binuhos pondo kontra baha

 

Hindi nakalusot kay Senate President Pro Tempore Panfilo “Ping” Lacson ang tanggapan ni Department of Budget and Management (DBM) Secretary Amenah Pangandaman sa isyu ng mga inilabas na pondo para sa kontrobersiyal na flood control projects.

Inakusahan niya ang DBM ng kapabayaan dahil inilabas ang flood control funds na hinugot mula sa unprogrammed appropriations sa ilalim ng 2025 General Appropriations Act.

“Maski paano mayroong negligence (ang DBM) kasi `yung unprogrammed appropriations papaano ito nahugot at napunta sa infrastructure project,” sabi ni Lacson.

Samantala, ibinunyag ni Lacson na higit sa P100 bilyon ang isiningit ng mga senador sa ilalim ng 19th Congress sa national budget ngayong taon.

Sabi ni Lacson, lumalabas sa dokumentong kanyang nakalap na ang mga siningit ay mga individual insertions, bagama’t na-tag na “For Later Release” o FLR.

“Sa Senate pa lang, at least P100 bilyon. Nagulat nga ako, sa individual insertions ito, ito naka-FLR ngayon,” ani Lacson sa panayam sa radyo.

“Pagkalalaki. Never pa ako nakakita kasi noong araw `di pa declared unconstitutional ang PDAF [Priority Development Assistance Fund] nandoon lang sa hundreds of millions. E ngayon nakita ko ang total, kabuuan at least P100 billion,” dagdag niya.

Ayon pa kay Lacson, hindi pa niya nakikita nang buo ang listahan ng mga miyembro ng Kamara de Representantes pero mahaba rin aniya ang listahan.

Maaaring tanungin ni Lacson ang mga kinauukulang ahensiya sa deliberasyon ng panukalang 2026 national budget sa Senado kung bakit pinayagan ang mga budget insertion.

“Sa budget deliberation pwede ko tanungin ito bakit pinayagan ito. Ang pagbusisi, lalo sa plenary, gusto kong malaman ilan sa siningit na insertion ang na-release at papaano na-implement,” aniya.