Mga kaalyado ni Trump kontrolado ang TikTok sa bagong US deal

 

Nilagdaan ni dating US President Donald Trump noong Huwebes ang isang executive order para sa panukalang kasunduan na magtatatag ng US version ng TikTok, kung saan bababa sa 20% ang Chinese ownership at mapupunta ang kontrol sa mga malalapit niyang kaalyado.

Kabilang sa mga investor dito ang Oracle founder na si Larry Ellison, tech investor Michael Dell, media mogul Rupert Murdoch gayundin ang investment firm na Silver Lake Management at Andreessen Horowitz.

Ayon kay Trump, sila ay mga “highly sophisticated” investor na mamamahala sa app.

Aniya, mananatiling bukas ang TikTok para sa 170 milyong American user habang masisiguro nila ang pambansang seguridad ng Amerika.

Kasama sa kasunduan ang pag-develop ng US-made algorithm na magiging katapat ng “secret sauce” ng orihinal na TikTok—ang sistemang nagpasikat dito bilang isa sa pinakamalaking social media platform sa mundo.

COA hinain fraud audit reports sa ICI vs P360M DPWH flood control projects sa Bulacan

 

Naghain nitong Biyernes ang Commission on Audit (COA) ng apat na fraud audit reports (FARs) sa Independent Commission for Infrastructure (ICI) kaugnay ng mga iregularidad sa apat na flood control projects ng Department of Public Works and Highways (DPWH)–Bulacan 1st District Engineering Office (DEO) na nagkakahalaga ng mahigit P360 milyon.

Batay sa imbestigasyon ng COA, isang proyekto ang hawak ng SYMS Construction Trading, habang tatlo naman ay nasa ilalim ng Topnotch Catalyst Builders Incorporated kasama ang kanilang joint venture partners.

Lumitaw sa FARs na iisa o ang naging suliranin ng mga proyekto, dahil itinuro ng mga kinatawan ng DPWH-Bulacan 1st DEO ang mga lokasyong hindi tumutugma sa mga aprubadong site. Wala ring naipakitang sapat na papeles upang bigyang-katwiran ang paglilipat, at natuklasan pang mayroon nang naunang flood control structures sa mismong mga lugar na sakop ng kontrata.

Kabilang sa mga tinukoy na proyekto ang P92.8 milyon na flood control sa Pulilan na hawak ng SYMS Construction Trading, ang P69.4 milyon na riverbank protection sa Plaridel ng Topnotch Catalyst Builders, at dalawang slope protection projects sa Bocaue na kapwa nagkakahalaga ng tig-P98.9 milyon na ipinatupad ng joint ventures ng Topnotch kasama ang Beam Team Developer Specialist Incorporated at One Frame Construction Incorporated.

Pinangalanan ng COA ang mga posibleng managot mula sa DPWH-Bulacan 1st DEO, kabilang sina District Engineer Henry Alcantara, Assistant District Engineer Brice Ericson Hernandez, Planning and Design Section Chief Ernesto Galang, Maintenance Section OIC-Chief Jaime Hernandez, Project Engineers Lemuel Ephraim Roque, John Carlo Rivera, at Emelita Morales, gayundin sina Engineers John Michael Ramos, Jolo Mari Tayao, John Michael Marcos, Claudine Magdalene Magsakay, Ericka Justine Chico, at Isiah Lor Galang.

Kasama rin sa listahan ang mga opisyal at board members ng mga contractor: Sally Santos ng SYMS Construction Trading; Eumir Villanueva ng Topnotch Catalyst Builders; Allan Kevin Payawal ng joint venture ng Topnotch at Beam Team Developer Specialist; at Gian Carlo Galang ng joint venture ng Topnotch at One Frame Construction, pati na rin ang iba pang corporate officers at board members ng mga naturang kumpanya.

Itinuturing ng COA na maaari silang masampahan ng kaso ng graft, malversation, falsification of documents, at paglabag sa Government Procurement Reform Act.

Binigyang-diin ng ahensya na pansamantala pa lamang ang listahan ng mga sangkot at maaari pang madagdagan habang nagpapatuloy ang imbestigasyon.

Sa pahayag ni COA Chairperson Gamaliel Cordoba, bahagi ito ng mas malawak na audit sa lahat ng flood control projects ng DPWH sa Bulacan mula Hulyo 2022 hanggang Mayo 2025.

Dagdag pa ng COA, ang pagsusumite ng FARs sa ICI ay tugon sa panawagan ni Pangulong Ferdinand Marcos Jr. na tiyakin ang wastong paggamit ng pondo ng bayan, at dapat asahan ng publiko na may susunod pang FARs laban sa mga kahina-hinalang proyektong pang-imprastruktura.

17 pa kakasuhan ng DOJ: 3 senador, cong tagilid sa flood scam

 

Umaabot sa 21 indibiduwal na kinabibilangan ng tatlong senador at isang kongresista ang inirekomenda na kasuhan dahil sa pagkakasangkot sa maanomalyang flood control projects, ayon sa Department of Justice (DOJ) nitong Biyernes.

Inilabas ng DOJ ang pangalan ng 21 indibiduwal na isasalang sa case build-up ng National Prosecution Service matapos irekomenda ng National Bureau of Investigation na kasuhan ang mga ito.

Kabilang sa listahan sina dating Senate President at Senador Francis “Chiz” Escudero, Senador Joel Villanueva, Senador Jinggoy Estrada, dating Senador Ramon Bong Revilla Jr., Ako Bicol Party-list Rep. Elizaldy “Zaldy” Co na dating chairman ng House Committee on Appropriations at dating Caloocan City Rep. Mary Mitzi “Mitch” Lim Cajayon-Uy.

Kasama rin sa listahan sina dating Public Works Undersecretary Roberto Bernardo at ang binansagang “BGC Boys” na sina Engineer Henry Alcantara, Engineer Brice Ericson Hernandez, Engineer Jaypee Mendoza at Engineer Arjay Domasig.

Sabit din sina alyas “Beng Ramos”, Alyas “Mina”, Maynard Ngu, Carleen Villa, John Carlo Rivera, Linda “Victoria” Macanas, Juanito Mendoza, Sally Nicolas Santos, Jesse Mahusay at alyas “Andrei Balatbat”.

Ibinase ng DOJ ang kanilang rekomendasyon sa affidavit nina Alcantara, Hernandez, Mendoza at Bernardo.

“Their statements provided the basis for identifying these individuals as having sufficient preliminary links to the acts under investigation,” saad ng DOJ.

“Those named will be required to answer, under the rule of law, the serious allegations now standing against them,” dagdag ng ahensiya.

Ipinaliwanag naman ni DOJ spokesperson Assistant Secretary Mico Clavano na kaya hindi nakasama sa listahan si dating Senador at ngayon ay Makati City Mayor Nancy Binay ay dahil si Villa ang pinangalanan na tumanggap ng kickback.

“The line to Sen. Binay is still being built,” ani Clavano.

Hindi naman dumating sa DOJ ang testigo ni Senador Rodante Marcoleta na si Orly Guteza na tumestigo sa Senado noong Huwebes kung saan isiniwalat nito na si ACT-CIS Rep. Eric Yap ang nagdedeliber ng male-maletang cash sa tahanan nina dating Speaker Ferdinand Martin Romualdez at Co.

Ang alegasyon ay itinanggi ni Romualdez at sinabing inimbento lamang ito para madawit siya sa flood control scandal.