Suplay ng kuryente patay-sindi pa rin sa Siquijor

 

Sa kabila ng pakikialam ng Malacañang, problema pa rin ang brownout sa Isla ng Siquijor na nakapeperwisyo sa mga negosyo at tahanan.

Nag-iskedyul ang Province of Siquijor Electric Cooperative Inc. (PROSIELCO), ng power interruption mula 8:30 a.m. hanggang 12:00 noon at 1:00 p.m. hanggang 5:00 p.m. nitong Setyembre 25, 27, 29 at 30. May buong araw pang brownout mula 8:30 a.m. hanggang 5:00 p.m. sa Cang-allas para sa line clearing. Ngayong Setyembre 26, alas-5:00 ng madaling-araw hanggang tanghali naman ang putol-kuryente para sa pagpapalit ng poste at paglilinis ng linya. Sa mga liham na ipinadala noong Setyembre 2 sa Department of Energy (DOE), National Electrification Administration (NEA), at Energy Regulatory Commission (ERC), inaaalam ng National Association of Electricity Consumers for Reforms (NASECORE) kung bakit inabot ng halos isang taon—at isang direktang babala mula kay Pangulong Ferdinand Marcos Jr. bago umaksiyon sa problema.

Para sa consumer watchdog sa usapin ng kuryente, hindi sapat ang mga paliwanag ng mga ahensiya. Giit nila, hindi dapat mangyari pa sa ibang lugar ang nangyari sa Siquijor. (Eileen Mencias)

COA nagpalusot sa mga ‘ghost’ project

 

Ginisa sa Senado ang mga opisyal ng Commission on Audit (COA) dahil sa kabiguan nilang matumbok ang katiwalian sa mga flood control project.

Ayon kay Sen. Sherwin Gatchalian, kung ginawa lamang ng COA ang kanilang trabaho ay napigilan sana ang mga “ghost” project sa Bulacan First District Engineering Office (DEO).

“Sa pagkakaintindi ko po sa isang district office, mayroon ho silang power na magplano, gumawa ng detailed engineering, sila na rin nagpapa-bid, sila na rin po nag-i-inspect at nagbabayad,” ani Gatchalian.

“Kapag nagbayad, COA papasok sa post-audit level. So ibig sabihin, kahit may ‘ghost’ project, made-detect ng COA sa post-audit level,” dagdag pa niya.

Tinukoy ng senador ang proyekto na 46% nang nagawa, dalawang araw matapos lumabas ang notice to proceed, at 89% na kumpelto makalipas lamang ang 86 araw.

Depensa naman ni COA auditor Tracy Ann Sunico, hindi nagsusumite ang DEO ng disbursement vouchers at dagdag na dokumento kaya notice of disallowance lamang ang iniisyu ng auditor.

Bukod dito, dalawa lang umano ang audit team matapos tanggalin ang halos isang daang plantilla positions sa ahensiya noong 2023.

“In 2023, sa budget ng COA for 2023, nagbawas po ng plantilla position by 100+ employees supposed to be na dapat ma-deploy sa auditing agencies. Kaya po ang distribution lang po ng bawat audit team na mabibigat, nasa 2 auditors lang po,” wika ni Sunico.

AFP niligwak coup plot vs PBBM

 

Itinanggi ng Armed Forces of the Philippines (AFP) na may destabilisasyon o bantang kudeta sa administrasyon ni Pangulong Ferdinand “Bongbong” Marcos Jr.

“The Armed Forces of the Philippines (AFP) rejects malicious narratives about supposed plans to unseat the President or launch destabilization efforts. These claims are baseless, unfounded, and far removed from reality,” saad ni AFP Public Affairs Office chief Col. Xerxes Trinidad.

Tiniyak din ni Trinidad na tapat ang militar sa Konstitusyon at sa samba¬yanang Pilipino.

“Our loyalty does not rest on politics or personalities, but firmly on the Constitution, the Republic, and the Filipino people. The AFP’s role is clear: to defend our democratic institutions, not to arbitrate political disputes,” ayon sa opisyal.

“We remain a professional and disciplined force, with the chain of command intact and united. Efforts to link the AFP to intrigue are nothing more than attempts to sow division, cast doubt on our leadership, and derail the President’s fight against corruption,” dagdag pa niya.