SEC sa publiko: Recovery modus ‘wag patulan

 

Binalaan ng Securities and Exchange Commission (SEC) ang publiko laban sa mga recovery at advance-fee recovery scam na nag-aalok tulungan ang mga taong bawiin ang kanilang pera sa scam pero muling nabubudol.

Sabi ng SEC, wala itong binibigyan ng pahintulot na online account o grupo para mag-alok ng “recovery services” at ang mga lumalapit sa mga biktima para gawin ito nang may bayad o hinihinging personal na impormasyon ay manloloko. “On the contrary, they are being utilized as instruments to exploit already vulnerable victims,” sabi ng SEC. Paalala ng SEC, huwag magbibigay ng pera o personal na impormasyon sa mga manlolokong ito.

Ilan sa mga red flag ng recovery scam ay: nangangakong isauli ang pera pero sisingilin ka muna; nagsasabing may koneksyon sila o accredited sila kuno ng law enforcement agencies; peke ang mga pinapakitang registration documents at ID; at mamadaliin kang magbayad agad o magbigay ng sensitibong impormasyon.

3 dating PS-DBM exec hugas-kamay sa Pharmally scandal

 Tatlong dating opisyal ng Procurement Service-Department of Budget and Management (PS-DBM) ang naghain ng not guilty plea sa kasong graft kaugnay ng diumano’y overpriced na pagbili ng P4.4 bilyong halaga ng personal protective equipment at surgical face mask mula sa Pharmally Pharmaceutical Corporation noong pandemya.

Nanindigan sina Allan Raul Catalan, Dickson Panti at Gerelyn Francisco Vergara sa mga mahistrado ng Second Division ng Sandiganbayan na wala silang kasalanan sa mga ibinibintang sa kanila.

Ang ibang kapwa akusado na sina Warren Liong ng PS-DBM at mga opisyal ng Pharmally na sina Mohit Dargani at Linconn Ong, ay hindi naman nakapaghain ng plea dahil nireresolba pa ng Sandiganbayan ang kanilang apela na ibasura ang kasong graft laban sa kanila.

Nanindigan ang anti-graft court na base sa isinagawag pagsusuri sa kaso laban kina Liong, Dargani at Ong, malinaw na ang “Information is sufficient in form and substance.”

168K estudyante inekis sa mga SUC

 

Kinuwestiyon ng isang senador ang mahigit 168,000 mag-aaral na hindi nakapag-enroll sa mga State Universities at Colleges (SUC) dahil sa kanilang limitadong kapasidad.

“Para sa akin, hindi ito makatarungan. Gusto natin silang mag-aral. Pero kahit na pumasa sila sa entrance exam at kulang ng kapasidad ang ating mga SUC, hindi sila makapag-aral,” saad ni Senador Sherwin Gatchalian, chairman ng Senate Committee on Finance. Sinuri ng tanggapan ni Gatchalian ang datos na isinumite ng 62 sa 115 na mga SUC. Batay sa pagsusuri, lumalabas na 32 (52%) ang lagpas na sa kanilang kapasidad. Samantala, 11 (18%) naman sa mga 62 SUC na ito ang umabot na sa 100% ng kanilang kapasidad. Dahil dito, 168,493 na mga mag-aaral ang napagkaitan ng pagkakataong makapag-enroll bagama’t kuwalipikado na silang pumasok sa mga naturang SUC.

Kinalampag ng senador ang mga SUC na tutukan ang pagpapalawak sa kanilang mga academic capacity. Hinimok rin niya ang mga ito na isumite ang kanilang mga requirement para sa capital outlay na nakatuon sa mga silid-aralan at iba pang pangangaila¬ngang pang-akademiko.