Atayde, 3 pang Quezon City solons kakasuhan sa flood control mess

 

Sasampahan ng civil case ng Lawyers for Commuters and Safety Protection (LCSP) sa Korte Suprema ang apat na mambabatas ng Quezon City na pinaghihinalaang sangkot sa maanomalyang flood control project sa lungsod.

Sa media briefing, sinabi ni LCSP President Atty. Ariel Inton, na kabilang sa kanilang kakasuhan ay si QC 1st District Congressman Arjo Atayde bunsod ng pagkukulang nito na tuparin ang kanyang tungkulin hinggil sa flood control projects kaya’t dumanas nang pagbaba sa Quezon City.

“Kakasuhan namin sila ng civil case, pani­gurado si Cong. Arjo Atayde, ang tanong dyan, did they perform their duty?, may honesty ba?” sabi ni Inton.

Naiintindihan ng LCSP ang pagkadismaya ni QC Mayor Joy Belmonte nang hindi ipi­naalam sa kanya ng mga QC congressman ang proyekto na wala sa Drainage Master Plan ng lungsod.

Batay sa isinumiteng ulat ni Belmonte kay Public Works Secretary Vince Dizon at ICI adviser Benjamin Magalong, na nasa P17 bilyon ang 331 DPWH flood control projects sa QC mula 2022 hanggang 2025 kung saan 305 dito wala sa Drainage Master Plan habang may 170 projects umano sa QC ay may  Congressional Insertion.

Umaasa rin ang LCSP na mapapanagot ng ICI ang lahat ng dapat managot sa usapin ng maanomalyang flood control projects sa bansa partikukar sa QC.

Una nang kinasuhan ng LCSP sa SC ang mga DPWH officials at contractors na inaakusahan na sangkot sa flood control projects.

Ex-DPWH execs may tig-P20 milyon pang-casino

 Inamin ni dating DPWH Bulacan 1st District assistant district engineer Brice Hernandez nitong Martes na nakakatanggap sila ng P20 milyon bawat isa, tatlong beses isang linggo upang ipanglaro sa casino.

Ayon kay Hernandez, ang boss nila na si dating district engineer Henry Alcantara ang nagbibigay ng pera sa grupo nila.

“Pag pumunta po kami sa grupo, may dala lang po na pera sa aming grupo, si boss Henry po. Dun po kami kumuha,” ani Hernandez.

Sinabi ni Hernandez na palaging may dalang pera na naka-bag sa kanyang sasakyan si ­Alcantara. “Naka-ready po talaga. Kung hindi po ako nagkakamali, isang bag na naglalaman ng P20 million,” ani Hernandez.

Sabi ni Hernandez, hindi niya alam kung ang mga bag ng pera ay nagmula sa mga pondo para sa mga proyektong pang-imprastraktura.

Inungkat ni Sen. Raffy Tulfo kay Hernandez ang P597 milyon na kabuuang halaga ng mga deposito ng pera sa kanyang 36 na bank account, ayon sa Anti-Money Laundering Council (AMLC).

Una ay itinanggi ni Hernandez ang nasabing halaga pero kalaunan ay sinabi niya na ang kabuuan ay maaaring umabot sa P597 milyon kung lahat ng deposito ay susumahin.

Alcantara sumalang sa ‘Witness’ evaluation ng DOJ

 Sumalang na sa inisyal na ebalwasyon para sa Witness Protection Program ng Department of Justice si dating DPWH Bulacan district engineer Henry Alcantara nitong Martes.

Ito’y kasunod ng kahilingan ni Justice Secretary Jesus Crispin Remulla na dalhin sa DOJ si Alcantara kasunod ng mabibigat na testimonya at pagbubunyag niya sa Senate Blue Ribbon Committee sa flood control projects, kabilang ang pag-amin niya na amo niya si dating DPWH Undersecretary Roberto Bernardo at mga pagbibigay ng mga komisyon mula sa mga flood control projects sa mga kampo nina Senators Jinggoy Estrada, Joel Villanueva, dating Senador Bong Revilla, Ako Bicol Rep. Zaldy Co, at dating Caloocan rep. Mitch Cajayon.

May mga dokumento at affidavit na nilagdaan si Alcantara sa DOJ, kasama ang kaniyang abugado, bagama’t hindi na idinetalye ang kaganapan sa pag-uusap ni Alcantara kay Remulla at sa WPP.

“Due to the gravity of the allegations in the affidavit and it being a sworn statement, I believe this will be very helpful to the DOJ and the Witness Protection Program in trying to file a case as soon as possible,” ani Remulla.

Kasabay nito, sinabi ng DOJ na nagsumite na sila ng mga dokumento sa Anti-Money Laundering Council (AMLC) para i-freeze ang bank accounts ni Alcantara.